هو في ايه؟ 2

كلاكيت اكشن تاني مرة .. بس انا بقا اللي احتمال اكون لوحدي اللي هتحول لعلامة استفاهم وتعجب بسبب الموضوع المستفز ده

واللي بيخليني دايما اسأل نفسي

هو في ايه؟؟؟!!!

كل السياسين في مصر - وعشان الحبايب نقول معظمهم - مش بيفكروا كويس وبالذات اللي مرشحين نفسهم لرئاسة الجمهورية دلوقتي

على الفيس بوك انتشر هترشح مين ومش هترشح مين .. وانا كنت بختار وكده بس لاقيت ان الموضوع ده زاد عن حده وانتشر وتوغل

اقولكوا هما مش بيفكروا كويس ليه بقا الناس دي - مع كامل احترااامي ليهم - عشان كل الناس برضو تركيزها على المناصب العليا

كله مهتم اوووووووي بانه ياخد منصب رئيس الجمهورية

يا حبابيبي يا بابا يا ابن الحلال هو احنا مش اتخلصنا من دكتاتور عشان ندخل عصر الديموقراطيه و كده وان الحاكم ميكونش له سلطات واسعه

احنا عايزين الاول مجلس شعب قوي ونثق فيه عشان هو اللي هيبقا نقطة الوصل بينا وبين الرئيس والحكومة

يعني لازم يكون اهتمامنا السياسي حاليا متركز على مين الناس الصالحه ترشح نفسها في مجلس الشعب

يعني لازم دور الاحزاب يظهر لازم نشوف تنافس شريف على الساحه في الاحزاب ومع الناس اللي عايزة تدخل مجلس الشعب

ولازم يكونوا ناس من الشعب وخايفين على الشعب ويقدروا يتحملوا المسئولية دي

لان خلاص مفيش مجلس سيد قراره زي زمان الموضوع ده انتهى

الشعب هو صاحب القرار

وعشان كده انا بحترم الاخوان المسلمين في النقطة دي - مش بقول اني معاهم ولا ليا نفس افكارهم - لا بحترم طريقتهم

منظمين لاقصى درجة ماشيين في طريق عارفين ازاي يقدروا يوصلوا لهدفهم وعددهم كمان كبير وليهم شعبيه عاليه وسط الناس

يا جماعه مش عايزين نرجع زي مان نكون متوقعين مين اللي هيكسب عشان معاه ناس كتير او له نفوذ

لا عايزين نوصل اننا نبقا متحيرين .. اه بجد متحيرين

من كمية الناس الموهوبة والمحتمرة و الجيدة في المجال السياسي اللي تقدر تتقدم بينا

ولما نخلص كل ده ونرتاح من هم مجلس الشعب ويكون عندنا برلمان حقيقي وبجد

نبقا نفكر بقا في مين يصلح يكون رئيس جمهورية

وبتمنى نعمل زي امريكا ويحصل مناظره محترمة ومناقشة

ياريت ده يحصل

وان شاء الله يحصل .. لاننا نستاهل نعيش كده

واحسن كمان من كده

هو في ايه؟

زمان فيما بين الحربين العالميتين .. كان الاستعمار بيستخدم سياسة معينة لوضع معوقات القومية العربيه .. وكانوا طرق كتير بس انا هذكر شوية منهم لفتوا نظري اوي:/

1- اثار النعرات المحليه في البلاد العربيه .. "فرعونيه في مصر " - آشورية بابلية في العراق" - " فينيقيه آراميه في سوريا

2- اثار الفتن الطائفيه (مسلمين ومسيحين في مصر ) .. ( سنة وشيعه في العراق) .. (الزيدية والسنية في اليمن) .. (الدروز والموارنه في لبنان)

طبعا انتوا حاسين وفي منكم فهم وفي منكم بيقول نعم طب انتي عايزة ايه دلوقتي

عايزة اقولكوا ان اللي بيحصل في مصر مش بس في مصلحة " الفلول" لا ده في مصلحة ناس كتير

بس اصل السؤال دايما اللي كل الشعب بيسألوا حاليا من اللي بيحصل في مصر

هو في ايه؟؟؟

احنا مكناش كده ايام الثورة طبعا الجملة دي سمعتوها مليون مرة وهنفضل نقولها تاني وتالت ورابع

اللي بيحصل ده في مصلحة " الفلول - وحبايبنا الوحشين اللي برا " .. يا جماعه سواء مسلم او مسيحي

هتفرق معاك في ايه "واحدة " اسلمت ولا بقت مسيحية

يعني دي اللي هتزود او تنقص من دينك؟؟؟

الدين لله والوطن للجميع يا عم الحاج

و مش بالملة ولا بالدين اللي هتخلينا نحارب بعض ويحصل كده

انا بشتري حاجات من سوبر ماركت صاحبه مسيحي وعاملني عادي ولانه عارف عيلتي وقالي اسلمله عليهم نفر نفر

يا اخواننا احنا جيران واصحاب وعيله

كام واحد فينا مسلم صاحبه وانتيمة مسيحي!!!

مين فينا في العيد الاضحى او الفطر مش بيهنيه مسيحي صاحبه او جاره او زميله في الشغل

جماعه احنا عايشين مع بعض من زمااااان اووووي ليه هنعمل في بعض كده

ليه هنسمح لشوية ناس تدمر حاجة حلوة احنا عملناها

اما بالنسبة للاخوة السلفيين والله لو حضرتك شايف ان تدمير كنيسة هو الحل لانك عايز تطبق الاحكام والشرائع

احب اقولك ايام الخلفاء عملوا معاهدات مع المسيحين واليهود وكانت بتنص على انهم يحتفظوا بكنائسهم ولا يسمح لهم ببناء كنائس اخرى بس يمكنهم ترميم كنائسهم ومعابدهم فقط .. بس استمر المسيحين و اليهود في بناء الكنائس و المعابد و تسامح معهم الحكام المسلمين

مادام عايز تعبد ربك اعبده مادام مش هتأذي غيرك

القرآن بيقول "لكم دينكم ولي ديني"

وحسب منهج التاريخ اللي انا بذاكره واللي انا جايبه منه الكلام ده

ان الجزيه اللي انتوا عايزين ترجعوها تاني اتشالت عشان المسيحين انضموا للجيش وفي اي حرب هيدافعوا معانا

عشان يحموا بلدهم اللي هي بلدك وبلدي وبلدنا كلنا

واللي من حق اي حد يعيش فيه

....

بس عامة اللي بجد مخليني من قمة استغرابي هتحول لعلامه تعجب وانا قاعدة

موقف الجيييييش والشرطة

حلويييييييييييين .. رايقييييييييييييييين ما علينا يعني دول عايزين حاجة لوحدهم

وبعدين لازم يتحط قانون يمنع التطرف الديني اللي بيحصل من بعض الناس في  الجانبين

عامة محاولات الفتنة الطائفيه اللي احنا بنحس بيها دي انا واثقة انها مش هتدمر البلد دي

لان احنا علاقتنا ببعض اكبر بكتيييييييييير من اي شئ

واحنا الحمدلله بالنسبة لخطط الاستعمار اللي فوق دي رقم (1) تخلصنا منها بقينا كلنا ايد واحدة بالنسبة للعرب بعد ما كان الناس حاسين ان مفيش وحدة بين الدول العربيه

عشان جامعه الدول العربيه مش بتعمل حاجة .. لانها ببساطة في وادي واحنا في وادي

و ليه جامعة الدول العربية في وادي واحنا في وادي .. لسبب واحد من وجهة نظري ان دي جامعه حكومات الدول العربية و ان وحده العرب الحقيقية في وحده شعوب العرب مش في وحدة حكوماتهم

وخاصه لو كانت الحكومات دي عايزة الحرق بجاز .. ووحدة الشعوب اقوى بكتييييييييير من وحدة حكومة لان الشعب اقوى من الحكومة وليس العكس
وانا عن نفسي شايفه ان الطريق للوحدة وان الدول العربيه تقلب موازين القوى في العالم ونبقا احنا الاقوى


وانا بطلب طلب من الناس كل واحد يسمع حكايه او يشوف صورة او فيديو اتأكد منه الاول لانك متعرفش دي حقيقة ولا فبركة واشاعات

ارجووك حكم عقلك ولسانك قبل ما تقول كلمة .. لان الشعب المصري من طبعه حاجتين بيموووت في النميمة وفضووولي جدااا

اتأكدوا يا جماعه من كلامك  لو سمحتوا

وحاجة تانيه اخيرة ياريت بلاش نستغرب من اللي بيحصل ده الطبيعي لان عشان توصل لقمة الجبل هتوقع كتيييير وتتكعبل في زلط وصخور وهتتبهدل

بس لازم نستحمل .. عشان نعييش

الانتماء في الحب

طبعا كلنا او معظمنا عارف سلسلة الافلام الشهيره الرومانسية

The Twilight Saga

انا من محبي الفيلم ده .. واكتر حاجة عجبتني فيه ان البطلة " بيلا " كانت وجهة نظرها عن الحب انه انتماء

وانا اراهن ان محدش فاهم معنى الانتماء في الحب يعني ايه

طب خلونا نبدأ من الاول

ليه الولد بيحب البنت الايام دي؟؟ .. او ليه الناس بتحب دلوقتي؟
 

يا اما عشان حلوة - او عشان اغراض دنيئة ففي دماغه - او عشان اعجب بيها وحبها

 واللي حبوا بجد دول نوعين:/

النوع الاول :/
 نوع اهو حب عشان يحب وخلاص وفي الاخر يتصدم بارض الواقع ويجي يقولها انا لسه مش لاقي الصفر اللي هبدأ منه حياتي ومش عايز اوقف حياتك .. أو يتعب في نص الطريق من الحب ويتخنق منها

 اما النوع التاني:/
 دول القلة القليلة اللي بتحب بجد ..  وياما القدر يفرق ما بينهم ..  او بيجوزوا بعض
 واللي اجوزوا دول
 نوع بيكمل في الجواز .. ونوع بيطلق عشان اتفاجئ بمسئولية زيادة عليه بسرعه

 واتحداك لو قولتلي ان ده مش الحب الايام دي

 بس مفيش انتماء!!

هتلاقي يعني ناس نااادرة ندرة المية في الصحرا بتحس بالانتماء ده
 الحب عندهم يديهم احساس بانه حياة جديدة صعب يرفضها
 زي اختيار قرار الادمان بس ده بيكون ادمان من نوع كويس
 هو الحب اللي بيدخل فيه العقل كمان
 هو ده حب العقل والقلب
ومش اقصد انه استغلال فرصة
بمعنى ان البنت بتشوف عيش جاهز تريح دماغها وتقول انا حكمت قلبي وعقلي واختارت
الانتماء انه يكون المستقبل عايزه مع حبيبك ده مش اقصد فرصة او استغلال انه غني لالا ممكن يكون انسان بيبتدي حياته
بس البنت تحس انها عايزة تكافح وتبني ذاتها
 بتحس انها بتنتمي للعالم المكافح بتاعه
 في ناس بيحبوا بعض وبتستنا حبيبها بس عشان بتحبه بس
 مش عشان عندها طموح زيه
 او عايزة تكافح
 ودول بقوا كتيييير
 وعلى فكره احساس الراجل ان حبيبته واقفة جمبه وبتكافح زيه وانها طموحه زيه
 بيخليه فرحان اكتر من كلمه بحبك على فكره

وده اللي كانت حساه بطله الفيلم .. بالرغم من ان كان عندها " جايكوب " وكان بيحبها وهي حاسه بشعور حب ناحيته .. مع ذلك اختارت " ادوارد " عشان بالرغم ان عالمه غير مثالي وملئ بالمتاعب بس حست انها تنتمي اليه

وخلص الكلام

ٍسلام

انا بحبك

حاجة غريبة حصلالي ومش فاهمة حصلت ليه
انا وياك بحس اني بنسا العالم باللي فيه
حاسه اني مش هقدرانساك
ومش ناوية اكمل الا معاك
حاسه اني بجد عايشة بسبب هواك

حبك احساس مش قادرة اداريه
حبك لغز ومش مهم حله الاقيه
حبك غير نظرتي للعالم باللي فيه
حبك ده انا بقيت عايشة بس بيه

انت مين ياللي خدت قلبي وعقلي مني
انا نفسي اعرف ايه دوبني فيك
انت مين ياللي ما تفهمني اللي حصلي
انا من الاخر بحبك وبموت فيك

جيت مرة واحدة غيرت معنى الدنيا
خلتني احبك واعشقك في ثانية
حسستني احساس عمري ماهنساه
خلتني اول مرة احس اني في الحياة
صعب نلاقي حبيب في منتهى الكمال
بس انت جيت عملت لعقلي احتلال

عاوزة اقولك كلمتين
عارف في حبك انا حاسه بايه
حاسه اني في عز الشتا مدفية
وكل اللي حواليا سقعانين

انت مين ياللي خدت قلبي وعقلي مني
انا نفسي اعرف ايه دوبني فيك
انت مين ياللي ما تفهمني اللي حصلي
من الاخر انا بحبك وبموت فيك

يوم الغضب والثورة - يوم 25 يناير

مش محتاجة اعرفكم ولا اديكم اي مقدمات عن الموضوع ده ولا حتى اشرح

انا بنت عندها 17 سنة ومن اسكندريه

انا بقولها وبعلنها انا نازلة بكره المظاهرات مع كل المصريين

انا كنت عايزة انزل النهاردة بس مقدرتش .. امي رفضت ومنعتني بالقوة 

وفضلت اتوسل واتحايل وارجوكي نزليني

قالتلي انتي ايه ينزلك هتتبهدلي في وسط الناس

قولتلها طب ما احنا كلنا متبدهلين عامة

قالتلي وانتي تعرفي ايه عن غلاء الاسعار ولا االلي احنا فيه

قولتلها مادام انتي مضايقة وانتي اللي حاسه انزلي معايا

مرديتش عليا ومشيت

هي خايفة عليا كأم .. بس نظره عينيها قالتلي نفسي انزلك

اولا لو انت مصري بجد انزل روح ساعد الناس دول

طب هو احنا ممكن نعمل حاجة ؟؟ .. ايوة

طبعااااا

لو صبروا

ومخافوش

والعدد زاد

بجد بلاش يأس وتشاؤم

انزل المظاهرات يلا يا واد انت ويا بت انتي حالا

طب والله ما بهزر

روح انزل

الناس دول محتاجين ليا وليك ولكل مصري

ايه انت فرحان بنفسك و انت قاعد في بيتك بطيخة وفي بنات نازلين؟؟؟؟ .. 

وانتي انزلي مفيش حاجة اسمها عيب انتوا بنات متنزلوش

اانا عارفه ان السياسة دي لعبه  قذرة وممكن يكون في جهات معارضة بتستفيد من اللي بيحصل والشباب هو اللي بيتبهدل فيها

ويمكن لا الكل بيعمل كده عشان هو بس مصري

في كل حال الثورة دي انزل فيها كمصري وقول لأ ساعتها اي حد هيخاف يجبرك على حاجة

وبقول لكل اللي متظاهرين بجد عشان خاطري

الكلام ده مش مني بس

ده من جيلي كله

احنا جيل وقف اودام وزير التعليم عشان المدارس بتاعته وكسبنا

ايه انتوا مش شجعان ولا ايه؟

عشان خاطر ابوك الغلبان اللي بيتعب وبيتبهدل

عشان ابنك اللي مش لاقي شغل وبيتعذب

انزلوا .. فوقوا .. اعملوا اي حاجة

مش هتخسروا حاجة لو جربتوا

والله مش هتخسروا حاجة

سلام

امضاء:/ مراهقة مش تافهه ومصرية

استراحة في نص الطريق

لو سمحت تسمحلي اسألك سؤال

انا عايزة اعرف مين اللي ضحك عليك وقال

اني ماليش قلب ولا احساس

واني مش بشر زي كل الناس

واني مجرد للتسلية وخلاص

مين اداك حق انك تذل فيا

مين اداك حق انك تضحك عليا

مين اداك الحق في الخيانه

مين اداك الحق في الاهانه

مين قال للناس اني ماليش قلب

ولا اني تقضية وقت في الحب

مين خلاهم يحبوني ويسيبوني زي الغريق

مين خلاني استراحة في نص الطريق؟